1 MIN
Forsætisráðherra tók við sáttmála gegn einelti, áreitni og ofbeldi
Framkvæmdastjóri SA afhenti forsætisráðherra sáttmálann
![](https://images.prismic.io/samtok-atvinnulifsins/8596440a-908e-4a29-ae18-fdf01333b515_sa_afhending_sattmala_gegn_einelti.jpg?auto=compress,format)
Halldór Benjamín Þorbergsson, framkvæmdastjóri Samtaka atvinnulífsins, afhenti Katrínu Jakobsdóttur, forsætisráðherra uppfærðan sáttmála gegn einelti, áreitni og ofbeldi í morgun. Sem fyrr, hvetja SA starfsfólk og stjórnendur fyrirtækja til að gera gildi hans að hluta af daglegum rekstri. Veggspjöldin með sáttmálanum má nálgast hér og er hægt að hengja upp í kaffistofum eða á göngum fyrirtækja til að minna á mikilvægi þess að tryggja vellíðan á vinnustöðum, öryggiskennd og góðan starfsanda.
Í sáttmálanum eru dregin fram gildi sem geta minnkað hættu á að einelti, áreitni eða ofbeldi á vinnustöðum eigi sér stað. Með því að hafa þau í heiðri stuðla starfsmenn að heilbrigðri vinnustaðamenningu.
Sáttmálann má einnig nálgast í Húsi atvinnulífsins og fyrirtæki geta óskað eftir því að fá það sent í pósti með því að senda tölvupóst á sa@sa.is .
Í sáttmálanum kemur eftirfarandi fram:
SÁTTMÁLI GEGN EINELTI, ÁREITNI OG OFBELDI
Góð vinnustaðamenning skiptir sköpum fyrir vellíðan starfsfólks. Á vinnustaðnum eigum við góð samskipti og virðum eftirfarandi sáttmála.
- Við þekkjum stefnu og viðbragðsáætlun fyrirtækisins gegn einelti, kynferðislegri og kynbundinni áreitni og ofbeldi og erum meðvituð um skyldur okkar.
- Við sýnum kurteisi og virðingu í öllum samskiptum.
- Við líðum ekki einelti, áreitni eða ofbeldi.
- Við beitum ekki slíkri háttsemi og vitum að meðvirkni getur skaðað starfsfólk og vinnu stað okkar.
- Við tökum tillit til ábendinga um að við getum bætt fram komu okkar.
- Við berum sameiginlega ábyrgð á vinnuumhverfinu og leggjum okkar af mörkum til að bæta það enn frekar.
- Við erum ólík, með mismunandi bakgrunn og lífsskoðanir, en sýnum hvert öðru virðingu í öllum samskiptum.
- Við skiljum að upplifun af samskiptum er mismunandi og gerum ekki lítið úr viðbrögðum og tilfinningum annarra.
- Við ræðum um framkomu sem okkur mislíkar, tökum upp varnir fyrir þá sem brotið er gegn og styðjum starfsfólk í að breyta hegðun sinni.